Z世代唔再追Rolex？點解年輕人突然瘋搶Cartier！｜#clubwatchhk

你有冇發現，而家二十幾歲嘅後生仔，第一隻名錶竟然唔再係勞力士，而係卡地亞？以前成日俾傳統錶迷笑係「買珠寶送錶」嘅 Cartier，最近竟然被 Gen Z 瘋狂搶購。數據仲顯示，後生仔買 Cartier 嘅比例喺幾年間足足暴升咗 4 倍！

點解以前玩大運動錶、玩勞力士嘅潮流，會一夜之間變成「細錶、斯文正裝錶」嘅天下？以前覺得老土、斯文嘅卡地亞，點樣變成今日嘅潮流流量密碼？今集同大家拆解背後三大原因，最後一條絕對會顛覆你對買錶嘅認知！

大家好，歡迎嚟到 Club Watch YouTube Channel，我係 Daphne。開始之前，別忘了 Like and Subscribe 再按旁邊的鐘仔 ，亦都可以留意我們 Club Watch 網站和最新的 Club Watch Luxury Magazine 網站，或者 Facebook 的最新資訊。

訂閱咗嘅朋友，可以考慮加入埋我哋嘅VIP會員，除咗優先觀看每期新片，再加送一條價值$380代用錶帶，除此之外，仲將會有其他福利，有興趣嘅朋友請留意我哋嘅公告，或留言查詢。

好！我哋先用數字講一講。根據 Chrono24 同 Fratello 最新發表嘅二手市場報告，由 2018 年至 2025 年，Gen Z 購買 Cartier 腕錶嘅比例，由 1.7% 急升到 6.8%，足足升咗四倍！更重要係，Cartier 喺所有年齡層嘅整體增長，其實只係由 2.9% 升到 4.8%，呢個代表咩？代表真正喺背後推爆 Cartier 銷量嘅，正正就係呢班二十幾歲嘅年輕人。

報告仲指出，Z 世代購買正裝錶嘅比例比幾年前增加咗 44%，遠遠高過其他年齡層。點解突然流行返細錶、正裝錶？原因好簡單：因為 Z 世代買錶唔係追求「男人味」，而係追求「穿搭感」。

以前大家買錶，追求愈大隻愈好，44mm 戴上手成個盾牌咁，要夠 Man、夠霸氣。但今日後生仔講求整體穿搭，佢哋會著闊腳西褲、Loafer、Vintage 外套。你想像下，著到斯斯文文，但戴隻 44mm 勁厚嘅潛水錶，成個畫面即刻錯晒。

相反，Cartier 本身就係設計出身。Tank、Santos 呢啲系列，設計超過一百年，方形、薄身、線條優雅，男女戴都好好睇。腕錶對年輕人嚟講，已經由「身份工具」變成「時尚配飾」。

第二個原因，聽落好奇怪，但真係要多謝 Rolex。講真，邊個後生仔想辛辛苦苦儲到筆錢，去錶行想買隻入門鋼錶，仲要睇人臉色、排幾年隊，甚至要「食骨」配貨買埋一堆唔要嘅豬肉錶？當市場由前幾年嘅瘋狂炒作回歸正常之後，後生仔開始清醒。

加上喺好多後生仔眼中有個刻板印象：Rolex 雖然保值，但出街撞錶撞到七彩，仲開始同「中年阿叔」、「暴發戶」畫上等號。你戴隻綠水鬼、Daytona，人哋覺得你隨波逐流；但你戴隻 Cartier，人哋會覺得你「有品味、識生活」。

最重要係，你唔使排隊，直接行入專門店，開開心心享受服務就買到。呢種消費尊嚴，先至係而家後生仔要嘅嘢。Morgan Stanley 嘅瑞士鐘錶產業報告亦都表明，Cartier 已經穩坐全球第二大瑞士腕錶品牌，市佔率接近 9%，僅次於 Rolex。呢個成績，絕對係靠呢股「反向操作」贏返嚟。

第三個推波助瀾嘅原因，就係明星效應。而家最紅嘅國際巨星，好似「甜茶」Timothée Chalamet、Jacob Elordi，甚至 Taylor Swift，出街都被人影到戴緊 Cartier。
有趣嘅地方係，Cartier 聰明在佢唔係用硬生生嘅商業代言去硬推，而係透過明星嘅私人日常穿搭去滲透。呢種不顯山、不露水嘅「Quiet Luxury」低調奢華風，完美踩中咗呢幾年後生仔最崇尚嘅氛圍。

不過，呢度我要俾個強烈嘅投資警告大家：並唔係所有 Cartier 都保值，買錯一樣會蝕到入肉！
如果你想買第一隻 Cartier，記得認住「三大巨頭」：Santos、Tank 同 Ballon Bleu（藍氣球）。呢三個系列設計辨識度最高，二手市場承接力最強。

最後想同大家玩個二選一，喺留言區大大討論一下： 如果依家俾你十至十五萬預算，你會揀排隊買隻 Rolex 鋼勞，定係會直接行入去買一隻 Cartier Santos、再加隻 Vintage Tank 輪流戴？喺留言區話我知！我們下次見 bye bye ！

更多資訊，請瀏覽：
Website 1: clubwatchlux.com
Website 2: clubwatchhk.com
Facebook: clubwatchhk
IG 1: @cwhk68088810
IG 2: @cwhk68088810.tst
IG 3: @cwhk68088810.ac
聯絡電話：6808 8810 / 9188 8912
#clubwatchlux, #clubwatchhk, #watchblog, #二手錶, #二手名錶, #名錶買賣, #腕錶, #K金腕錶, #機械錶, #機械腕錶, #石英錶, #石英腕錶, #rolex , #勞力士 , #chrono24 , #daytona , #cartier , #genz , #fratello , #流行 , #santos , #vintage , #tank , #BallonBleu, #時尚配飾 , #綠水鬼 , #morganstanley , #TimothéeChalamet , #jacobelordi , #taylorswift

source